Módre buny

Ludowe nakładnistwo Domowina, Budyšin 2017, 210 str.

 

W Budyskim wolejbulowym towarstwje Běła Hwězda je so strašny njeskutk stał. Nětko přepytujetaj młoda komisarka Janka Žurowa a jeje kolega Alek zhromadnje pad. Tola tež priwatnje so tójšto njewočakowaneho stawa.

Kak to jenož praju?

Ludowe nakładnistwo Domowina| Domowina - Zwjazk Łužiskich Serbow z.t./ Rěčny centrum WITAJ 2017, 144 str.

 

Přiručka za bohatši słowoskład za wyšu šulu a gymnazij kaž tež za wšitkich dalšich zajimcow. Předstaju někak 2100 hesłow a jich wotpowědniki, při čimž pomha syła

přikładowych sadow při prawym zasadźenju namjetowanych słowow.

Za wšě pady přećelki!

Ludowe nakładnistwo Domowina, Budyšin 2014, 188 str.

 

Wšitko započnje so tak rjenje: Skónčnje su prózdniny, a Anja a Paula móžetej šěsć tydźenjow dołho jěchać. Wšitko pak so nahle změni, jako zhonitej, zo je Jurkec jěchanski dwór chutnje wohroženy a zo ma so tež hišće Pauliny najlubši kóń předać! To njemóžetej wězo přihladować. Hdy no njeby so jenož stajnje něšto nimo kuliło. Je to stawizna wo konjach a wo přećelstwje, zapołožena we łužiskej wjesce, w Płóšecach.

 

 

W putach Čorneho pana

Ludowe nakładnistwo Domowina, Budyšin 2011, 176 str.

 

Matej a Stefan njebyštaj ženje wočakowałoj, zo změje přenocowanje w lěsu tajke sćěhi. Přeprěčo Čertowu wudrjeńcu dóstanjetaj so do mócnarstwa Čorneho pana. Budźe Matej Stefana zaso wuswobodźić móc a puć domoj namakać?

 

 

Saperliška

Domowina - Zwjazk Łužiskich Serbow z.t./ Rěčny centrum Witaj 2010, 63 str.

 

Kelko móžnosćow mamy, serbsce nic jenož wo smjeću, zrudobje, hněwanju abo tež wo hłuposćach rěčeć, sym zhromadnje z Rěčnym centrumom Witaj zestajiła. Přiručka za zakładnych šulerjow je rjenje ilustrowana (ilustrował: Uwe Häntsch) a hodźi so wězo tež za wšitke druhe wćipne Jěwy, lěnje kože, něme karpy abo ganzory při błyskanju.

 

 

Cuze zynki

Ludowe nakładnistwo Domowina, Budyšin 2009, 176 str.
awtoraj: Lubina und Dušan Hajduk-Veljković

 

Pjatnaće powědančkow wo wšědnosćach a njewšědnosćach žiwjenja, z małymi a wulkimi rjekami, kiž motaja so po wšědnym dnju a spytaja, swoje wotmołwy na stajne wužadanja namakać.

 

 

Juliana

Ludowe nakładnistwo Domowina, Budyšin 2007, 132 str.

 

Juliana, dwanaćelětna holca, poda so do Lipska k swojej njeznatej kuzinje Danje na prózdniny. Dołho pak pola njeje njewutraje a ćeknje - a z tym dóstanje so do praweho dyrdomdeja z Florianom.

 

 

Dyrdomdej mjez swětami

Ludowe nakładnistwo Domowina, Budyšin 2007, 21 str.
awtoraj: Lubina und Dušan Hajduk-Veljković; rysowar: Dragan Bosnić

 

Filip, Matej a Mira wotkryja w Budyskim Serbskim muzeju wrota do přichoda - a dóstanu so do swěta androidow. Zo bychu so scyła nawróćić móhli, dyrbja nuznje klučowe kamuški namakać.

 

Pawčina złósće

Ludowe nakładnistwo Domowina, Budyšin 2006, 206 str.

 

W Lejnicach namakaja při twarskich dźěłach na kěrchowje starše ćěło mortweje, kotruž pječa nichtó ze wsy njeznaje. Wuskušowanja wjedu młodu komisarku Alinu po njewšědnych pućach hač do Skandinawiskeje a do časa druheje swětoweje wójny, po boku nazhoniteho komisara Lankuša.

 

 

Ćipka w lěsu

Ludowe nakładnistwo Domowina, Budyšin 2004, 56 str.

 

Ćipka wuběhnje sej z kokošaceje farmy do lěsa. A tu hakle zhoni, što je prawe přećelstwo, kak wažne je mjeno a što je mać. Do toho pak ma tóšto strašnych a napjatych dyrdomdejow dožiwić.

 

 

Wurywanki

Ludowe nakładnistwo Domowina, Budyšin 2001, 72 str.
awtoraj: Lubina und Dušan Hajduk-Veljković

 

Za "Wurywanki" dóstachmoj w lěće 1999 myto Załožby, hra w 15 scenach njeje pak so do dźensnišeho ženje na jewišću předstajiła. Hač su sceny přeprowokantne? Zajimcej zwostanje tuž tuta wuběrna knižka, zo móhł sej sam wobšěrniši wobraz wo nowšej serbskej dramatice stworić.

 

 

pjatk haperleje

Ludowe nakładnistwo Domowina, Budyšin 1998, 64 str.

 

Z basnjemi je wšitko započało, a k nim so hdys a hdys rady wróću. Je to poetiska zhusćenosć, kiž mje wabi a zdobom hnuje. Hdyž su słowa tak zesadźane, zo zdadźa so w tym wokomiku jenički móžny wuraz być - za basnika a čitarja.

 

prěnje jejko

swójske wudaće z Madleńku Šołćic, 1998, 53 str.

 

Tuta kniha njeje na předań. Bě to zhromadny projekt z Madleńku, swójsku knihu w małym nakładźe zhotowić, kiž njeje ani lektorka do toho widźała, wot prěnjeho pismika hač k předani wšitko samej činić. Ilustracije su wot Madleńki Šołćic.

 

Druckversion Druckversion | Sitemap
© 2017 Lubina Hajduk-Veljković